Міхась Канстанцінавіч Міцкевіч

Міхась Канстанцінавіч Міцкевіч
Міхась Канстанцінавіч Міцкевіч
Дата нараджэння	31 студзеня 1926
Месца нараджэння	Менск, Менская акруга, БССР, СССР;
Дата смерці	27 мая 2020 (94 гады)
Месца пахавання	Вайсковыя могілкі;
Грамадзянства	Беларусь;
Бацька	Якуб Колас
Жонка	Наталля Іванаўна Фёдарава[d]
Дзеці	Марыя Міхайлаўна Міцкевіч
Род дзейнасці	навуковец
Месца працы	Фізіка-тэхнічны інстытут НАН Беларусі;
Навуковая ступень	доктар тэхнічных навук
Альма-матар	Маскоўскі авіяцыйны інстытут; БПІ (1949);
Вядомы як	даследчык у галіне апрацоўкі металаў
Прэміі
	Медыяфайлы на Вікісховішчы

Міхась (Міхаіл) Канстанцінавіч Міцкевіч (31 студзеня 1926, Менск — 27 мая 2020, Мінск) — беларускі навуковец у галіне апрацоўкі металаў. Лаўрэат Дзяржаўнай прэміі БССР (1980). Доктар тэхнічных навук (1985). Майстар спорту СССР па стэндавай стральбе. Малодшы сын Якуба Коласа^[1].

Біяграфія

Міхась Канстанцінавіч Міцкевіч маладзейшы з трох сыноў Якуба Коласа.

Да пачатку нямецкай акупацыі ў час Другой сусветнай вайны закончыў восем класаў сярэдняй школы № 49 Мінска (I—VII класы вучыўся ў школе № 14 Мінска), у 1943 г. — дзесяцігодку ў Ташкенце з атэстатам выдатніка. Паступіў у Варонежскі авіяцыйны інстытут на машынабудаўнічы факультэт (інстытут месціўся ў Ташкенце ў час эвакуацыі); у тым самым годзе перавёўся ў Маскоўскі авіяцыйны інстытут на аналагічны факультэт. У 1947 г. пераехаў у Мінск. У 1949 г. скончыў Беларускі політэхнічны інстытут (цяпер — БНТУ) па спецыяльнасці «тэхналогія машынабудавання».

З 1949 г. працаваў у Фізіка-тэхнічным інстытуце Нацыянальнай акадэміі навук Рэспублікі Беларусь, дзе займаў пасады малодшага навуковага супрацоўніка (1949—1961), галоўнага інжынера лабараторыі (1961—1968), загадчыка лабараторыі (1969—1993). З 1993 г. — галоўны навуковы супрацоўнік.

Падрыхтаваў больш за 150 навуковых прац, аўтар звыш 20 вынаходніцтваў.

Памёр 27 мая 2020 года^[2]. Пахаваны на Вайсковых могілках у Мінску.

Узнагароды

За распрацоўкі ў галіне тэхналогіі і абсталявання для электраэразійнай апрацоўкі металаў уганараваны Дзяржаўнай прэміяй БССР (1980).

Сям’я

Жонка Міхася Канстанцінавіча — Наталля Іванаўна Фёдарава (1924—2012), дачка беларускага пісьменніка Янкі Маўра. З ёй меў траіх дзяцей: сыноў Сяргея (1947—2025) і Кастуся і дачку Марыю^[3].

Спорт

Мае званне «майстар спорту», браў удзел і быў прызёрам першай спартакіяды народаў СССР (1956) у спаборніцтвах па стэндавай стральбе.

Хобі

Захапленні — паляванне, фатаграфія, складанне эпіграм.

У літаратурнай творчасці свайго бацькі

Стаў прататыпам галоўнага героя дзіцячай паэмы Якуба Коласа «Міхасёвы прыгоды» (1934). Малодшаму сыну паэт прысвяціў таксама вершы: «Рагатка» (1934), «Дронік» (1935—1936), «Не тужы» (1939), «Сыну» (1942), «Міхасю» (1943), «…Адстану я, і час разлукі» (1946).

Зноскі

↑ Грушэцкі А.Л.. Памёр Міхась Міцкевіч, малодшы сын Якуба Коласа (нявызн.)(недаступная спасылка). Новы Час (27 мая 2020). Архівавана з першакрыніцы 28 мая 2020. Праверана 28 мая 2020.
↑ Памёр малодшы сын Якуба Коласа Міхась Міцкевіч
↑ Памёр Сяргей Міцкевіч — унук Якуба Коласа і Янкі Маўра (бел.). Наша Ніва (22 мая 2025). Праверана 22 мая 2025.

Літаратура

Міцкевіч Міхаіл Канстанцінавіч // Беларуская энцыклапедыя: У 18 т. Т. 10: Малайзія — Мугаджары / Рэдкал.: Г. П. Пашкоў і інш. — Мн. : БелЭн, 2000. — Т. 10. — 544 с. — 10 000 экз. — ISBN 985-11-0035-8. — ISBN 985-11-0169-9 (т. 10). — С. 489.