Рассвет (Акцябрскі раён)

Рассвет
Краіна	Беларусь
Вобласць	Гомельская
Раён	Акцябрскі
Сельсавет	Пратасаўскі
Каардынаты	52°46′44″ пн. ш. 29°10′26″ у. д.HGЯO
Першая згадка	XIX стагоддзе
Ранейшыя назвы	Качай-Балота
Насельніцтва	▼389 чал. (2011);
Часавы пояс	UTC+3
Тэлефонны код	+375 2357
Паштовыя індэксы	247311
Аўтамабільны код	3
	Рассвет на Вікісховішчы

Рассве́т^[1] (трансліт.: Rassviet; да 1962 года Кача́й-Бало́та) — аграгарадок у Беларусі, у Акцябрскім раёне Гомельскай вобласці. Цэнтр Пратасаўскага сельсавета.

Геаграфія

Знаходзіцца за 32 км (за 29 км^[2]) на паўночны ўсход ад гарадскога пасёлка Акцябрскі, 175 км (180 км^[2]) ад Гомеля, 16 км ад чыгуначнай станцыі Ратміравічы, размешчанай на чыгунцы Бабруйск — Рабкор, адгалінаванні лініі Асіповічы — Жлобін (за 15 км ад прыпыначнага пункта Чорныя Брады^[2]).

На рацэ Рудзянка (прыток Нератоўкі), на поўначы і поўдні меліярацыйныя каналы.

Транспартныя сувязі па прасёлкавай, затым аўтамабільнай дарозе Акцябрскі — Парычы.

Планіроўка складаецца з просталінейнай вуліцы, блізкай да шыротнай арыентацыі, да якой з поўдня і поўначы далучаюцца 3 завулкі. Забудова двухбаковая, драўляная, сядзібнага тыпу. У 1986 годзе пабудавана 50 цагляных хат, у якіх змесцаваліся перасяленцы з забруджаных радыяцыяй у выніку аварыі на Чарнобыльскай АЭС месцаў. У складзе сельскагаспадарчага ДП «Майсееўка» з цэнтрам у аднайменнай вёсцы, малочнатаварная ферма, мехпарк, зерняток. Сярэдняя школа, дзіцячы сад, амбулаторыя, культурна-спартыўны цэнтр, бібліятэка, аддзяленне сувязі, лясніцтва, лазня, комплексны прыёмны пункт, 3 крамы^[3].

Гісторыя

Па пісьмовых крыніцах вядомая з XIX стагоддзя як вёска ў Чэрнінскай воласці Бабруйскага павета Мінскай губерні. Большасць вясковых земляў належала памешчыцы В. Аненкавай. Пазначана на карце 1866 года, якая выкарыстоўвалася Заходняй меліярацыйнай экспедыцыяй, што працавала ў гэтым раёне ў 1890-я гады.

На 1925 год у Раманішчаўскім сельсавеце Парыцкага раёна Бабруйскай акругі. У 1922 годзе адкрыта школа і створана камуна, на аснове якой у 1929 годзе арганізаваны калгас «Малады ленінец», працаваў паравы млын з лесапільняй. Падчас Вялікай Айчыннай вайны ў красавіку 1942 года нямецкія акупанты спалілі 5 двароў і забілі 27 жыхароў. 31 жыхар загінуў на фронце.

З 20 чэрвеня 1985 года цэнтр Пратасаўскага сельсавета^[4].

Насельніцтва

1908 год — 44 двары, 246 жыхароў.
1925 год — 56 двароў.
1940 год — 95 двароў, 410 жыхароў.
1959 год — 437 жыхароў (паводле перапісу).
1997 год — 225 гаспадарак, 535 жыхароў.
2001 год — 504 жыхары, 205 двароў^[2].
2004 год — 196 гаспадарак, 459 жыхароў.
2011 год — 172 гаспадаркі, 389 жыхароў.

Вядомыя асобы

Андрэй Міхайлавіч Пінчук (1913—1944) — Герой Савецкага Саюза^[5]. Яго імя носіць адна з вуліц вёскі.

Крыніцы

↑ Назвы населеных пунктаў Рэспублікі Беларусь: Гомельская вобласць: нарматыўны даведнік / Н. А. Багамольнікава і інш.; пад рэд. В. П. Лемцюговай. — Мн.: Тэхналогія, 2006. — 382 с. ISBN 985-458-131-4 (DJVU).
↑ ^а ^б ^в ^г БелЭн 2001.
↑ Аграгарадок Рассвет Архівавана 28 кастрычніка 2011.
↑ Рашэнне выканаўчага камітэта Гомельскага абласнога Савета народных дэпутатаў ад 20 чэрвеня 1985 г. // Збор законаў Беларускай ССР, указаў Прэзідыума Вярхоўнага Савета Беларускай ССР, пастаноў Савета Міністраў Беларускай ССР. — 1985, № 23 (1829).
↑ Пінчук Андрэй Міхайлавіч // Беларуская энцыклапедыя: У 18 т. Т. 12: Палікрат — Праметэй / Рэдкал.: Г. П. Пашкоў і інш. — Мн. : БелЭн, 2001. — Т. 12. — С. 376. — 10 000 экз. — ISBN 985-11-0035-8. — ISBN 985-11-0198-2 (т. 12).

Літаратура

Гарады і вёскі Беларусі: Энцыклапедыя. Т. 1, кн. 1. Гомельская вобласць / С. В. Марцэлеў; Рэдкалегія: Г. П. Пашкоў (галоўны рэдактар) і інш. — Мн.: БелЭн, 2004. 632 с.: іл. Тыраж 4000 экз. ISBN 985-11-0303-9 ISBN 985-11-0302-0
Памяць: Гіст.-дакум. хроніка Акцябрскага р-на. — Мн.: БЕЛТА, 1997. — 478 с. ISBN 985-6302-03-X
Рассвет // Беларуская энцыклапедыя: У 18 т. Т. 13: Праміле — Рэлаксін / Рэдкал.: Г. П. Пашкоў і інш. — Мн. : БелЭн, 2001. — Т. 13. — С. 360. — 10 000 экз. — ISBN 985-11-0035-8. — ISBN 985-11-0216-4 (т. 13).