Уладзімір Яўгенавіч Кухараў

Уладзімір Яўгенавіч Кухараў
Старшыня Мінскага гарадскога выканаўчага камітэта з 3 верасня 2020
Прэзідэнт	Аляксандр Лукашэнка
Кіраўнік урада	Раман Галоўчанка
Папярэднік	Анатоль Сівак
Намеснік Прэм’ер-міністра Рэспублікі Беларусь 18 жніўня 2018 — 3 верасня 2020
Прэзідэнт	Аляксандр Лукашэнка
Кіраўнік урада	Сяргей Румас Раман Галоўчанка
Папярэднік	Анатоль Калінін
Пераемнік	Анатоль Сівак
Кіраўнік адміністрацыі Цэнтральнага раёна Мінска 2009 — 2012
Нараджэнне	1972 Ціманава, Ціманаўскі сельсавет, Клімавіцкі раён, Магілёўская вобласць, БССР, СССР
Адукацыя	МДУ імя А. А. Куляшова (1993) БІП — Інстытут правазнаўства (1999) Акадэмія кіравання пры Прэзідэнце Рэспублікі Беларусь (2012)
Узнагароды

Уладзі́мір Яўге́навіч Ку́хараў (нар. 1972, в. Ціманава, Клімавіцкі раён, Магілёўская вобласць) — беларускі дзяржаўны дзеяч, старшыня Мінскага гарадскога выканаўчага камітэта з 3 верасня 2020 года.

Намеснік прэм’ер-міністра Рэспублікі Беларусь (18 жніўня 2018 года — 3 верасня 2020 года), Намеснік старшыні Камітэта дзяржаўнага кантролю (2016—2018), Першы намеснік старшыні Мінскага гарвыканкама (2012—2016), кіраўнік адміністрацыі Цэнтральнага раёна Мінска (2009—2012).

Нарадзіўся ў 1972 годзе ў вёсцы Ціманава Клімавіцкага раёна Магілёўскай вобласці. У 1993 годзе скончыў Магілёўскі дзяржаўны педагагічны ўніверсітэт імя А. А. Куляшова. Пяць гадоў (1993—1999) працаваў дырэктарам Барысавіцкай няпоўнай сярэдняй школы Клімавіцкага раёна, пазней гэтак жа быў дырэктарам сярэдняй школы № 3 Клімавічаў. У 1999 годзе паступіў у Беларускі недзяржаўны інстытут правазнаўства, а пачынаючы з гэтага ж года і сканчваючы 2009 годам займаў розныя пасады ў структурах Камітэта дзяржаўнага кантролю. У 2012 годзе скончыў Акадэмію кіравання пры Прэзідэнце Беларусі. З 2009 года займаў пасаду кіраўніка адміністрацыі Цэнтральнага раёна Мінска. Пазней, у 2012 годзе, быў павышаны на пасаду Першага намесніка старшыні Мінскага гарвыканкама. З 2016 па 2018 гады займаў пасаду намесніка старшыні Камітэта дзяржаўнага кантролю^[1][2][3].

У суботу, 18 жніўня 2018 года, па рашэнню Аляксандра Лукашэнкі Уладзімір Кухараў быў прызначаны на пасаду намесніка Прэм’ер-міністра Рэспублікі Беларусь Сяргея Румаса. Як сказаў сам Прэзідэнт: «Кухараў будзе курыраваць пытанні ЖКГ, транспарту, а таксама пытанні будаўніцтва»^[4].

3 верасня 2020 года Прэзідэнт Рэспублікі Беларусь Аляксандр Лукашэнка прызначыў Кухарава старшынёй Мінскага гарадскога выканаўчага камітэта^{[5][6][7][8][9]}. Былы старшыня Мінскага гарадскога выканаўчага камітэта, Анатоль Сівак, быў прызначаны на пасаду намесніка Прэм’ер-міністра Рэспублікі Беларусь^{[10][11][12][13]}.

• Медаль «За працоўныя заслугі» (2022)^[14];
• Ордэн Айчыны III ступені (2025).

• Савет Міністраў Сяргея Румаса

• Профіль Уладзіміра Кухарава на сайце government.by Архівавана 10 красавіка 2020.