கத்தோலிக்க திருச்சபையின் பொது நாள்காட்டி

கத்தோலிக்க திருச்சபையின் பொது நாள்காட்டி என்பது உரோமன் கத்தோலிக்க திருச்சபையின் வழிபாட்டு முறை எங்கெல்லாம் நடைமுறையில் உள்ளதோ அங்கெல்லாம் கடைப்பிடிப்பதற்காக வகுக்கப்பட்ட தனி நாள்காட்டி ஆகும். இந்நாள்காட்டியில் வழிபாட்டு ஆண்டின் ஒவ்வொரு நாளும் அனுசரிக்கப்பட வேண்டிய புனிதர் விழாக்கள், ஆண்டவர் இயேசுவின் வாழ்வுதொடர்பான மறைநிகழ்வுகள் போன்றவை குறிக்கப்பட்டிருக்கும்^[1].

இப்பொது நாள்காட்டி தவிர, தனித்தனி நாடுகளுக்கும் துறவற சபைகளுக்கும் உரிய நாள்காட்டிகளும் உண்டு.

இந்த எல்லா நாள்காட்டிகளிலும் குறிக்கப்படுகின்ற கொண்டாட்டங்கள் கீழ்வருமாறு வரிசைப்படுத்தப்படுகின்றன:

• விருப்ப நினைவு (வி.நி.) - இந்நாளில் தரப்படுகின்ற புனிதரின் நினைவாகத் திருப்பலி கொண்டாடலாம் என்னும் குறிப்பாகும்
• நினைவு (நி.) - இந்நாளில் தரப்படுகின்ற புனிதரின் நினைவாகத் திருப்பலி கொண்டாட வேண்டும் என்னும் குறிப்பாகும்
• விழா (வி.) - இந்நாளில் தரப்படுகின்ற மறையுண்மையை அல்லது புனிதரை விழா சிறப்பித்து திருப்பலி நிறைவேற்ற வேண்டும் என்னும் குறிப்பாகும். விழாத் திருப்பலியில் உன்னதங்களிலே என்று தொடங்கும் வானவர் கீதம் இடம்பெறும்.
• பெருவிழா (பெ.) - இந்நாளில் தரப்படுகின்ற மறையுண்மையை அல்லது புனிதரை பெருவிழா கொண்டாடி ஆடம்பரத் திருப்பலி நிறைவேற்ற வேண்டும் என்னும் குறிப்பாகும். பெருவிழாத் திருப்பலியில் வானவர் கீதத்துடன், கூடுதலாக நம்பிக்கை அறிக்கையும் இடம்பெறும்.

கத்தோலிக்க திருச்சபை பல ஆயிரக் கணக்கான புனிதர்களைச் சிறப்பிக்கிறது. உரோமை மறைச்சாட்சியர் நூலில் (Roman Martyrology) அடங்கியுள்ள எல்லாப் புனிதர்களும் கத்தோலிக்க திருச்சபையின் பொது நாள்காட்டியில் இல்லை. அதுபோலவே அந்த நாள்காட்டியில் உள்ள எல்லாப் பெயர்களும் உரோமை மறைச்சாட்சியர் நூலிலும் இல்லை^[2]. ஆக, கத்தோலிக்க திருச்சபையின் பொது நாள்காட்டியில் சில புனிதர்களின் பெயர்களே இடம் பெறுகின்றன.

திருச்சபையால் அதிகாரப்பூர்வமாக புனிதர் நிலைக்கு உயர்த்தப்படும் எல்லாருமே கத்தோலிக்க திருச்சபையின் பொது நாள்காட்டியில் இடம் பெறுவதில்லை. இச்சிறப்பு தேர்ந்தெடுக்கப்பட்ட ஒரு சிலருக்கே வழங்கப்படுகிறது.

வேறு சில நாள்காட்டிகளில் ஒரே நாளுக்குப் பல புனிதர்கள் குறிப்பதும் உண்டு^[3]. பொது நாள்காட்டியில் புனிதர்களின் பெயர் இல்லாத நாள்களுக்கும் புனிதர் பெயர்களைச் சேர்ப்பதுண்டு.

ஒரு நாட்டில் கொண்டாடப்படுகின்ற புனிதர்களின் நினைவு வேறு எல்லா நாடுகளிலும் கொண்டாடப்படும் என்றில்லை. எடுத்துக்காட்டாக, அயர்லாந்து நாட்டில் புனித பாட்ரிக், மெக்சிகோ நாட்டில் குவாதலூப்பே அன்னை, ஐக்கிய அமெரிக்க நாடுகளில் புனித எலிசபெத் ஆன் சீட்டன், இந்திய நாட்டில் புனித ஜான் தெ பிரிட்டோ (ஓரியூர் புனித அருளானந்தர்) என்பவர்களின் விழாக்கள் அந்தந்த நாடுகளுக்குச் சிறப்பானவை. அதுபோலவே, கத்தோலிக்க திருச்சபையில் உள்ள தனித்தனி துறவற சபைகள் தத்தம் நிறுவுநர் நினைவைத் தனியாகச் சிறப்பிப்பது வழக்கம்.

பொது நாள்காட்டியில் தரப்படுகின்ற புனிதர் நினைவு, விழா போன்றவை உலகனைத்துக்கும் பொருந்துகின்ற கொண்டாட்டங்கள் ஆகும்.

இச்சீர்திருத்தம் இரண்டாம் வத்திக்கான் சங்கத்தால் (1962-1965) கொண்டுவரப்பட்டது. சங்கத்தின் கூற்றுப்படி,

முந்திய நூற்றாண்டுகளில் புனிதராக ஏற்கப்பட்ட சிலர் 1969இல் புனிதர் நிலையிலிருந்து "கீழிறக்கப்பட்டார்கள்" என்னும் தவறான கருத்து சிலரிடையே நிலவுகிறது. எடுத்துக்காட்டாக, புனித கிறிஸ்தோபர் என்பவரைக் கூறலாம். இவர் பெயர் புனிதர் வரிசையில் "மறைச்சாட்சியர் நூல்" என்னும் ஏட்டில் (16ஆம் நூற்றாண்டு) உள்ளது. ஆனால், இவரது வாழ்வு பற்றி நமக்குக் கிடைக்கும் குறிப்புகள் புனைவுச் செய்தியாக இருந்தாலும் அவருக்கு மிகப் பழங்காலத்திலிருந்தே வணக்கம் செலுத்தப்பட்டு வந்துள்ளதாலும், தனித் திருச்சபைகளில் அப்புனிதரின் நினைவு உளதாலும், பொது நாள்காட்டியில் பிற்காலத்தில் மட்டுமே அவர் பெயர் சேர்க்கப்பட்டதாலும் இப்போது அவர் பெயர் பொது நாள்காட்டியில் தரப்படவில்லை என்று திருத்தந்தை ஆறாம் பவுல் விளக்கினார்.^[4]

• திருக்காட்சி பெருவிழாவை அடுத்துவருகின்ற ஞாயிறு (அல்லது, திருக்காட்சி விழா சனவரி 7 அல்லது 8இல் வந்தால் அதைத் தொடர்ந்துவரும் திங்கள் கிழமை): ஆண்டவரின் திருமுழுக்குப் பெருவிழா.
• உயிர்ப்பு பெருவிழாவுக்கு முந்திய நாற்பத்து ஆறாம் நாள்: திருநீற்றுப் புதன்.
• உயிர்ப்பு பெருவிழாவுக்கு முந்திய ஞாயிறு: குருத்து ஞாயிறு.
• உயிர்ப்பு பெருவிழாவுக்கு முந்திய வியாழக் கிழமை: பெரிய வியாழன்.
• உயிர்ப்பு பெருவிழாவுக்கு முந்திய வெள்ளிக் கிழமை: புனித வெள்ளி.
• மார்ச் 20ஆம் தேதிக்குப் பின் வருகின்ற முழுநிலவுக்கு அடுத்த ஞாயிறு: உயிர்ப்பு பெருவிழா.
• உயிர்ப்பு பெருவிழாவை அடுத்து வரும் ஞாயிறு: இறை இரக்க ஞாயிறு.
• உயிர்ப்பு பெருவிழாவிலிருந்து நாற்பதாம் நாள்: ஆண்டவரின் விண்ணேற்றம்.
• உயிர்ப்பு பெருவிழாவிலிருந்து ஐம்பதாம் நாள்: தூய ஆவிப் பெருவிழா.
• தூய ஆவிப் பெருவிழாவை அடுத்து வரும் ஞாயிறு: மூவொரு இறைவன் பெருவிழா.
• மூவொரு இறைவன் பெருவிழாவை அடுத்து வரும் ஞாயிறு: ஆண்டவரின் திருவுடல், திருஇரத்தப் பெருவிழா.
• தூய ஆவிப் பெருவிழாவை அடுத்து வரும் இரண்டாம் ஞாயிறுக்குப் பின் வரும் வெள்ளி: இயேசுவின் திரு இதயப் பெருவிழா.
• தூய ஆவிப் பெருவிழாவை அடுத்து வரும் இரண்டாம் ஞாயிறுக்குப் பின் வரும் சனி: மரியாவின் மாசற்ற இதயம்.
• பொதுக்காலத்தின் இறுதி ஞாயிறு (நவம்பர் 27ஆம் தேதிக்கு முந்திய ஞாயிறு): கிறிஸ்து அரசர் பெருவிழா.
• கிறிஸ்து பிறப்பு பெருவிழாவின் எண்கிழமையின் உள் வருகின்ற ஞாயிறு (அவ்வாறு ஞாயிறு வரவில்லை என்றால் டிசம்பர் 30ஆம் தேதி): திருக்குடும்ப பெருவிழா.

இந்தியா உட்பட பல நாடுகளில் சில பெருவிழாக்கள் வார நாளில் வந்தால் அவை அடுத்துவரும் ஞாயிற்றுக் கிழமைக்குத் தள்ளிவைக்கப்படுகின்றன. இவ்வாறு வரும் கொண்டாட்டங்கள்:

• திருக்காட்சி பெருவிழா சனவரி முதல் தேதிக்குப் பின் வரும் ஞாயிறு.
• ஆண்டவரின் விண்ணேற்றப் பெருவிழா உயிர்ப்பு ஞாயிறுக்குப் பின் வரும் ஏழாம் ஞாயிறு.
• ஆண்டவரின் திருவுடல், திருஇரத்தப் பெருவிழா தூய ஆவிப் பெருவிழாவுக்கு அடுத்த ஞாயிறு.

உலகெங்கிலும் கிறிஸ்து பிறப்புப் பெருவிழா டிசம்பர் 25ஆம் தேதியே கொண்டாடப்படும். அதுபோல, இந்தியாவில் தூய கன்னி மரியாவின் விண்ணேற்பு பெருவிழா எப்போதும் ஆகஸ்டு 15ஆம் தேதியே கொண்டாடப்படும்.

கீழே ஆண்டின் ஒவ்வொரு மாதத்திலும் கொண்டாடுவதற்குக் குறிக்கப்படுகின்ற பெருவிழாக்கள் (பெ.), விழாக்கள் (வி.), நினைவுகள் (நி.), விருப்ப நினைவுகள் (வி.நி.) சுருக்கக் குறியீடுகளோடு தரப்படுகின்றன. குறிப்புகள் எதுவுமே தரப்படாத நாள்கள் "விடுமுறை" ("Feria") ஆகும்.

கத்தோலிக்க திருச்சபையின் சிறப்பு நாள்காட்டி (இந்தியா)