மக்னீசியம் சயனைடு

மக்னீசியம் சயனைடு (Magnesium cyanide) என்பது Mg(CN)₂ என்ற மூலக்கூற்று வாய்பாட்டால் விவரிக்கப்படும் ஒரு கனிம வேதியியல் சேர்மமாகும். இது ஒரு நச்சுத்தன்மை வாய்ந்த வெள்ளை நிற திடப்பொருளாகும். கால்சியம் ஐசோசயனைடு போலல்லாமல், சயனைடு ஈந்தணைவிகள் 0.3‑கிலோகலோரி/மோல் தடையுடன் கார்பனில் ஒருங்கிணைய விரும்புகின்றன.^[1] இந்த உப்பை 500 °செல்சியசு வெப்பநிலைக்கு சூடாக்கும் போது, ​​மக்னீசியம் நைத்திரைடாகச் சிதைகிறது.^[2]

மக்னீசியம் சயனைடை தயாரிப்பதற்கான முதல் முயற்சி 1924 ஆம் ஆண்டில் முயற்சிக்கப்பட்டது. நீரிலுள்ள ஐதரசன் சயனைடின் கரைசலை மக்னீசியம் உலோகத்துடன் வினைபுரியச் செய்வதன் மூலம் இம்முயற்சி மேற்கொள்ளப்பட்டது.

HCN + Mg → Mg(CN)₂ + H₂

இருப்பினும், மக்னீசியம் சயனைடு எதுவும் காணப்படவில்லை, மக்னீசியம் ஐதராக்சைடு மட்டுமே உருவாக்கப்பட்டது. இந்த சிக்கலைத் தவிர்க்க, தண்ணீரை வினை ஊடகமாகப் பயன்படுத்துவதற்குப் பதிலாக, தூய அம்மோனியாவை -30 °செல்சியசு வெப்பநிலையில் பயன்படுத்தலாம். வினையில் மக்னீசியம் சயனைடு அம்மோனேட்டு உருவாகும். 180 °செல்சியசு வெப்பநிலைக்கு இது சூடுபடுத்தப்பட்டால் மக்னீசியம் சயனைடு உருவாகும்.^[3] மின்சார கார்பன் குழாயில் மக்னீசியம் பெரிசயனைடை சிதைப்பது போன்ற பிற தயாரிப்பு முறைகளும் சாத்தியமாகும். இவ்வினையில் இரும்பு கார்பைடு துணைப் பொருளாக உருவாகிறது.^[2]

மக்னீசியம் சயனைடு வெள்ளி நைட்ரேட்டுடன் வினைபுரிந்து MgAg₂(CN)₄ என்ற மூலக்கூற்று வாய்ப்பாட்டைக் கொண்ட மக்னீசியம் வெள்ளி சயனைடை உருவாக்குகிறது. இந்தச் சேர்மம் சூடாக்கப்படும்போது, ​​தண்ணீரின் முன்னிலையில் ஐதரசன் சயனைடு வாயு மற்றும் மக்னீசியம் ஐதராக்சைடை உருவாக்குகிறது. அதாவது மக்னீசியம் சயனைடு உற்பத்திக்கான பாதையாக இதைப் பயன்படுத்த முடியாது. வெள்ளி நைட்ரேட்டு சேர்மம் மக்னீசியம் சயனைடுடன் வினைபுரியும் போது, MgAg(CN)₃ என்ற வாய்ப்பாடு கொண்ட மற்றொரு மக்னீசியம் வெள்ளி சயனைடை உருவாக்குகிறது.^[2]