செல்வராசா கஜேந்திரன்

செல்வராசா கஜேந்திரன் நாடாளுமன்ற உறுப்பினர்
இலங்கை நாடாளுமன்ற உறுப்பினர்
பதவியில் ஆகத்து 2020 – செப்டம்பர் 2024
தொகுதி	தேசியப் பட்டியல்
பதவியில் 2004–2010
தொகுதி	யாழ்ப்பாண மாவட்டம்
தனிப்பட்ட விவரங்கள்
பிறப்பு	29 அக்டோபர் 1974 (1974-10-29) (அகவை 50)
தேசியம்	இலங்கையர்
அரசியல் கட்சி	தமிழ்த் தேசிய மக்கள் முன்னணி
பிற அரசியல் தொடர்புகள்	தமிழ்த் தேசியக் கூட்டமைப்பு
வாழிடம்	மணல்தரை ஒழுங்கை, கந்தர்மடம், யாழ்ப்பாணம்
சமயம்	இந்து
இனம்	இலங்கைத் தமிழர்

செல்வராசா கஜேந்திரன் (Selvarajah Kajendren, பிறப்பு: அக்டோபர் 29, 1974) இலங்கைத் தமிழ் அரசியல்வாதியும், நாடாளுமன்ற உறுப்பினரும் ஆவார்.^[1]

கஜேந்திரன் 1974 அக்டோபர் 29 இல் பிறந்தார்.^[1] 2001/02 காலப்பகுதியில் யாழ்ப்பாணப் பல்கலைக்கழகத்தின் மாணவர் அமைப்புத் தலைவராக இருந்தார்.^[2]

கஜேந்திரன் 2004 நாடாளுமன்றத் தேர்தலில் தமிழீழ விடுதலைப் புலிகள் இயக்கத்தினால் முன்மொழியப்பட்டு தமிழ்த் தேசியக் கூட்டமைப்பு வேட்பாளராக யாழ்ப்பாண மாவட்டத்தில் போட்டியிட்டு,^[3] வெற்றி பெற்று நாடாளுமன்றம் சென்றார்.^[4] 2010 மார்ச்சில், கஜேந்திரனும், ததேகூ நாடாளுமன்ற உறுப்பினர்கள் கஜேந்திரகுமார் பொன்னம்பலம், பத்மினி சிதம்பரநாதன் ஆகியோரும் இணைந்து கூட்டமைப்பில் இருந்து விலகி, தமிழ்த் தேசிய மக்கள் முன்னணி என்ற அமைப்பை ஆரம்பித்தனர்.^[5][6]

கஜேந்திரன் 2010 நாடாளுமன்றத் தேர்தலில் தமிழ்த் தேசிய மக்கள் முன்னணியின் வேட்பாளராக யாழ்ப்பாண மாவட்டத்தில் போட்டியிட்டார். இத்தேர்தலில் இவரது கட்சியைச் சேர்ந்த எவரும் வெற்றி பெறவில்லை.^[7][8] 2011 பெப்ரவரியில், தமிழ்த் தேசிய மக்கள் முன்னணியின் பொதுச் செயலாளராக நியமிக்கப்பட்டார்.^[9] 2015 நாடாளுமன்றத் தேர்தலில் இம்முன்னணியின் வேட்பாளராக யாழ்ப்பாண மாவட்டத்தில் மீண்டும் போட்டியிட்டார், எனினும் இம்முன்னணியின் எந்த உறுப்பினரும் வெற்றி பெறவில்லை.^[10][11]

கஜேந்திரன் 2020 நாடாளுமன்றத் தேர்தலில் யாழ்ப்பாண மாவட்டத்தில் தமிழ்த் தேசிய மக்கள் முன்னணியின் வேட்பாளராக மீண்டும் போட்டியிட்டார். ஆனாலும் இவர் தெரிவு செய்யப்படவில்லை.^[12][13][14] ஆனாலும், தமிழ்த் தேசிய மக்கள் முனன்ணிக்குக் கிடைத்த ஒரு தேசியப் பட்டியல் உறுப்பினர் பதவி இவருக்கு கட்சி வழங்கியது.^[15][16]