Леанард Аўгусцінавіч Кржыжаноўскі

Леанард Аўгусцінавіч Кржыжаноўскі
Дата нараджэння	невядома
Месца нараджэння	Гродзенская губерня
Дата смерці	невядома
Альма-матар	юрыдычны факультэт МДУ[d]
Узнагароды
Медыяфайлы на Вікісховішчы

Леанард Аўгусцінавіч Кржыжаноўскі^[1] (Крыжаноўскі^[2]) — грамадзянскі інжынер, архітэктар, які працаваў у Гродзенскі губерні. Калежскі асэсар^[2].

Нарадзіўся ў Гродзенскай губерні. Каталік. Скончыў юрыдычны факультэт Маскоўскага ўніверсітэта^[d][2].

У 1856—1878 гадах працаваў пры будаўнічым аддзяленні Гродзенскага губернскага праўлення. Быў грамадзянскім інжынерам былой палаты дзяржаўнай маёмасці^[2].

У 1878 годзе быў пераведзены на пасаду архітэктара і інжынера ў павятовы горад Цяханаў Плоцкай губерні^[1].

24 снежня 1858 года яму загадвалася скласці каштарыс на рамонт праваслаўнага сабора ў Слоніме, які знаходзіўся ў «самым разладжаным стане, пагражаў нават небяспекай»^[1].

4 чэрвеня 1860 года засведчыў перабудову Свята-Мікалаеўскай царквы ў мястэчку Дубне. Зацвярджаў заканчэнне будаўніцтва Свята-Георгіеўскай царквы ў мястэчку Мсцібаве Ваўкавыскага павета (не захавалася), будоўлю прыходскага вучылішча ў мястэчку Свіслачы (21 студзеня 1861) і Спаса-Праабражэнскай царквы ў Дзярэчыне (12 лістапада 1862)^[1].

На пасадзе члена гродзенскага губернскага будаўнічага аддзялення Кржыжаноўскі меў права даваць указанні архітэктарам. У прыватнасці, 11 лістапада 1866 года ён рэкамендаваў скласці «неадкладна праект і каштарыс на перабудову каталіцкага касцёла м. Бяроза у праваслаўную царкву» і пры гэтым прапанаваў праект званіцы для яе^[1].

17 кастрычніка 1877 года падаў справаздачу аб аглядзе недабудаванага касцёла ў мястэчку Зэльве, у якім напісаў рэкамендацыі па яго дабудове^[1].

• Абмерныя чарцяжы царквы Святой Ганны ў вёсцы Харашэвічы Ваўкавыскага павета (1877)^[1].
• Будаўніцтва Спаса-Праабражэнскай царквы ў вёсцы Міронім Пружанскага павета (1866)^[1].
• Выканаўца работ па ўзвядзенні Свята-Крыжаўзвіжанскай царквцы ў вёсцы Клепачы Ваўкавыскага павета (9 студзеня 1861)^[1] — не захавалася.
• Выканаўца работ па ўзвядзенні Свята-Троіцкай царквы ў вёсцы Шчары Слонімскага павета (1859)^[1] — не захавалася.
• Выканаўца работ па рамонце Свята-Троіцкай царквы ў мястэчку Зэльве Ваўкавыскага павета^[1].
• Каштарыс і праект на рамонт Свята-Петра-Паўлаўскай царквы ў мястэчку Бярозе Пружанскага павета (1864)^[1].
• Праект агароджы з брамай і план мясцовасці Троіцкай царквы ў горадзе Слоніме (1874)^[1].
• Праект агароджы і званіцы Спаса-Праабражэнскай царквы ў мястэчку Дзярэчыне Слонімскага павета (1875)^[1].
• Праект змененай званіцы Свята-Пакроўскай царквы ў сяле Ятвеску Ваўкавыскага павета (1877)^[1].
• Праект перабудовы касцёла Святых апосталаў Пятра і Паўла ў праваслаўную царкву ў мястэчку Новадзевяткавічах Слонімскага павета (19 кастрычніка 1871, разам з Мікалаем Ціхвінскім)^[1].
• Праект перабудовы Свята-Мікалаеўскай царквы ў вёсцы Самуйлавічы Дольныя Ваўкавыскага павета (19 красавіка 1876)^[1].
• Праект Свята-Крыжаўзвіжанскай царквы і іканастаса ў вёсцы Варацэвічах Пінскага павета (1870)^[1].
• Праект Свята-Пакроўскай царквы ў мястэчку Клецку Слуцкага павета (1870-я гады)^[3].
• Праект Свята-Петра-Паўлаўскай царквы ў вёсцы Вензавец Слонімскага павета (1867)^[1].
• Праект Свята-Успенскай царквы ў вёсцы Дабраволі Ваўкавыскага павета (1850-я гады)^[1].

Узнагароджаны брыльянтавым пярсцёнкам, бронзавым медалём у памяць вайны 1853—1856 гадоў, ордэнам Святога Станіслава 2-й і 3-й ступеняў^[2].