உருபீடியம் செருமேனியம் அயோடைடு

உருபீடியம் செருமேனியம் அயோடைடு (Rubidium germanium iodide) என்பது RbGeI₃என்ற மூலக்கூற்று வாய்பாட்டால் விவரிக்கப்படும் ஒரு கனிம வேதியியல் சேர்மமாகும். உருபீடியம் மற்றும் செருமேனியம் ஆகிய தனிமங்களின் மும்மை ஆலைடு சேர்மம் என்று இது வகைப்படுத்தப்படுகிறது. ஒளிமின்னழுத்த பயன்பாடுகளுக்கான நச்சுத்தன்மை வாய்ந்த CH₃NH₃PbI₃ சேர்மத்திற்கு இது ஒரு சாத்தியமான இணையாகக் கருதப்படுகிறது.^[1]

செருமேனியம்(II) ஐதராக்சைடுடன் ஐதரயோடிக் அமிலத்தில் கரைக்கப்பட்ட உருபீடியம் அயோடைடு கரைசலைச் சேர்த்து வினைபுரியச் செய்வதன் மூலம் உருபீடியம் செருமேனியம் அயோடைடை தயாரிக்கலாம்.:^[2]

Ge(OH)₂ + RbI + 2 HI → GeRbI₃ + 2 H₂O

உருபீடியம் செருமேனியம் அயோடைடு பல்வேறு சிதைந்த பெரோவ்சிகைட்டு போன்ற கட்டமைப்புகளுடன் பல்லுருவங்களில் காணப்படுகிறது. இது Ge2⁺ அயனியின் மையத்தில் உள்ள "பிணைப்பு அல்லாத" இணை எலக்ட்ரான்களின் செல்வாக்கை பிரதிபலிக்கிறது.^[3]

அறை வெப்பநிலையில், உருபீடியம் செருமேனியம் அயோடைடு கருப்பு நிறத்தில் கனசதுர பெரோவ்சிகைட்டு வடிவத்தைக் கொண்டுள்ளது. -29 ° செல்சியசு வெப்பநிலை மற்றும் -52 °செல்சியசு வெப்பநிலைகளுக்கு இடையே கருப்பு செஞ்சாய் சதுர வடிவமும்; -52 °செல்சியசு வெப்பநிலை மற்றும் -92 °செல்சியசு வெப்பநிலைகளுக்கு இடையே போர்டாக்சு-சிவப்பு நேர்சாய்சதுர பெரோவ்சிகைட்டு வடிவமும்; மற்றும் -92 ° செல்சியசு வெப்பநிலைக்குக் கீழே எலுமிச்சை-மஞ்சள் நேர்சாய்சதுர வடிவமும் கொண்ட பண்புகளை உருபீடியம் செருமேனியம் அயோடைடு வெளிப்படுத்துகிறது.^[4]