Тара́нная ко́сць[1] (лац.: talus) — адна з касцей перадплюсны, якая фарміруе ніжнюю частку галёнкаступнёвага сустава праз злучэнне з вяліка- і малагалёнкавай касцямі. Знізу таранная косць злучаецца з пятачнай косцю, а спераду — з чоўнападобнай. Праз гэтыя сучляненні таранная косць перадае вагу цела на ўсю ступню. Таранная косць з’яўляецца другой па велічыні сярод касцей перадплюсны, а працэнт пакрыцця яе сустаўным храстком з’яўляецца найбольшым сярод усіх касцей цела чалавека.
Таранная косць складаецца з цела (лац.: corpus tali), якое спераду пераходзіць у шыйку (лац.: collum tali), якая сканчаецца галоўкай (лац.: caput tali). Цела тараннай косці ўверсе мае так званы блок (лац.: trochlea tali). Верхняя сустаўная паверхня (лац.: facies superior) блока служыць для сучлянення з дыстальнай сустаўнай паверхняй вялікагалёнкавай косці. Латаральная і медыяльная шчыкалаткавыя паверхні (лац.: facies malleolares lateralis et medialis) блока з’яўляюцца месцам сучлянення з сустаўнымі паверхнямі шчыкалатак вялікагалёначнай і малагалёнкавай касцей. На вонкавай паверхні блока размяшчаецца латаральны адростак тараннай косці (лац.: processus lateralis tali). На ніжнім боку тараннай косці праходзіць баразна (лац.: sulcus tali), а ззаду — задні адростак (лац.: processus posterior tali)[2].
