பண்டைய தமாசுக்கசு நகரம்

பண்டைய தமாசுக்கசு நகரம்
யுனெசுக்கோ உலகப் பாரம்பரியக் களம்
	பண்டைய டமாஸ்கஸ் நகரத்தின் நுழைவாயில்
அமைவிடம்	டமாஸ்கஸ், சிரியா
உள்ளடக்கம்	உமய்யா மசூதி; அசம் அரண்மனை; தமாசுக்கசு அரண்மனை;
கட்டளை விதி	பண்பாட்டுக் களம்: (i), (ii), (iii), (iv), (vi)
உசாத்துணை	20bis
பதிவு	1979 (3-ஆம் அமர்வு)
விரிவுகள்	2011
அழியும்நிலை	2013–
பரப்பளவு	86.12 ha (0.3325 sq mi)
Buffer zone	42.60 ha (0.1645 sq mi)
ஆள்கூறுகள்	33°30′41″N 36°18′23″E / 33.51139°N 36.30639°E
	சிரியாவில் பண்டைய டமாஸ்கஸ் நகரத்தின் அமைவிடம்

பண்டைய தமாசுக்கசு நகரம் (Ancient City of Damascus) சிரியா நாட்டின் வரலாற்றுச் சிறப்பு மிக்க பண்டைய நகரம் ஆகும். உலகில் மக்கள் தொடர்ந்து வாழும் நகரங்களில் ஒன்றான தமாசுக்கசு நகரத்தில், கிமு 3200 முதல் மக்கள் தொடர்ந்து வாழ்கின்றனர். ^[1] இப்பண்டைய தமாசுக்கசு நகரத்தில், கிறித்தவ தேவாலயங்கள் மற்றும் இசுலாமியர்களின் மசூதிகள் உள்ளிட்ட, பல தொல்லியல் களங்களைக் கொண்டுள்ளது. பண்டைய தமாசுக்கசு நகரத்தில் கிரேக்கர்கள், உரோமர்கள், பைசாந்தியர்கள் மற்றும் உதுமானியப் பேரரசசினர் தங்களின் பண்பாட்டுக் களங்களை நிறுவியுள்ளனர்.

ரோமானியர்கள் சிரியாவை ஆட்சி செய்த போது, பண்டைய வரலாற்றுக் கால தமாசுக்கசு நகரத்தைச் சுற்றி கட்டிய கோட்டைச் சுவர்களை, 1979ல் யுனெசுகோவால் உலகப் பாரம்பரியக் களாக அறிவிக்கப்பட்டது.

2011 முதல் நடைபெறும் சிரிய உள்நாட்டுப் போர் காரணமாக, சிரியாவின் அனைத்து உலகப் பாரம்பரியக் களங்களும், அழியும் நிலையில் உள்ளதாக, சூன், 2013ல் யுனெசுகோ நிறுவனம் அறிவித்துள்ளது.^[2]

தமாசுக்கசு நகரத் தோற்றம் மற்றும் நிறுவகையும்

பராடா ஆற்றின் ^[3] தெற்குக் கரையில் அமைந்த, சிரியா நாட்டின் தலைநகரான பண்டைய தமாசுக்கசு நகரம், கிமு 3000 ஆண்டில் 86.12 ஹெக்டேர் பரப்பளவில் நிறுவப்பட்டது. உரோமானியர்களால் இந்நகரத்தைச் சுற்றிலும் 4.5 கிலோ மீட்டர் சுற்றளவு கொண்ட கோட்டைச் சுவர் கட்டப்பட்டத்து. பின்னர் எகிப்தின் அய்யூப்பிடு வம்சத்தாரும் ^[4] மற்றும் எகிப்தின் மம்லுக் வம்சத்தாரும் ^[5] இக்கோட்டைச் சுவரை வலுப்படுத்தினர்.^[2]

கிமு இரண்டாயிரத்தில் முதன்முதலாக தம்ஸ்கு ("Ta-ms-qu") என அழைக்கப்பட்ட தமாசுக்கசு நகரம், இட்டைட்டு பேரரசுக்கும், புது எகிப்திய இராச்சியத்திற்கும் நடுவில், அமோரிட்டுப் பகுதியில் அமைந்திருந்தது.

செமிடிக் மொழியான அரமேயம் பேசிய அரமேனியர்கள், ^[6] தமாசுக்கசு நகரத்தை திமிஷ்கு எனும் பெயரில், கிமு 11ம் நூற்றாண்டு முதல், கிமு 733 வரை ஆண்டனர்.^[7]

வரலாற்றுக் காலக்கோடுகள்

வரலாற்றுக் காலத்தில் தமாசுக்கசு நகரம் கீழ்கண்ட இராச்சியங்களின் கீழ் இருந்தது.

கிமு 2500 – கிமு 15ஆம் நூற்றாண்டு கானானியர்கள் ஆட்சியில்
கிமு 15ம் நூற்றாண்டு - கிமு 12ம் நூற்றாண்டின் பிற்பகுதி வரை, எகிப்தின் புது இராச்சியத்தின் கீழ்
கிமு 12ம் நூற்றாண்டின் பிற்பகுதி முதல் - கிமு 732 வரை அரமேயம் மொழி பேசிய அரமேனியர்கள் ஆட்சியில்^[8]
கிமு 732 - 609 , புது அசிரியப் பேரரசில்
கிமு 609 - 539 வரை பாபிலோனியர்கள் ஆண்டனர்.
கிமு 539 -332 , பாரசீகத்தின் அகாமனிசியப் பேரரசு
கிமு 332 - கிமு 323 , பேரரசர் அலெக்சாந்தரின் மாசிடோனியப் பேரரசு
கிமு 323 -301 வரை, ஆண்டிகோனஸ் வம்சம்
கிமு 301 -198 , தாலமைக் பேரரசு
கிமு 198 -167, செலூக்கியப் பேரரசு
கிமு 167 -110, செலூக்கியப் பேரரசின் பாதியளவு தன்னாட்சி கொண்ட ஆட்சியாளர்கள்.
கிமு 110 -85, டெக்கோபோலிஸ் ஆட்சியாளர்கள்
கிமு 85 - 64, நபதீனியர்கள் ^[9]
கிமு 64 –27, உரோமைப் பேரரசு
கிமு 27 – கிபி 395, உரோமைப் பேரரசு
கிபி 476 – 608, பைசாந்தியப் பேரரசு
கிபி 608 – 622, பாரசீகத்தின் சசானியப் பேரரசு
கிபி 622 – 634, பைசாந்தியப் பேரரசு
- கிபி 529 – 634, அரேபிய கசானித்துகள்^[10]
கிபி 634 – 661, ராசிதீன் கலீபாக்கள்
661–750, உமையா கலீபகம்

750–885, அப்பாசியக் கலீபகம்
885–905, எகிப்திய துலுனித்துகள் ^[11]
905–935, மீண்டும் அப்பாசியக் கலீபகம்
935 – 969, இக்சித்தித் வம்சம் ^[12]
970–973, பாத்திம கலீபகம் ^[13]
973–983, சியா இசுலாமிய கார்மதியர்கள்
983–1076, பாத்திம கலீபகம்
1076–1104, சன்னி இசுலாமிய செல்யூக் பேரரசு
1104–1154, துருக்கிய புருத் வம்சம் ^[14]
1154–1174, துருக்கிய செங்கித் வம்சம்^[15]
1174–1260, எகிப்தின் அய்யுப்பித்து வம்சம் ^[16]
மார்ச் 1260 – ஆகஸ்டு, 1260 மங்கோலியப் பேரரசு
1260 –1521, எகிப்தின் மம்லுக் சுல்தானகம்^[17]
1516–1918, துருக்கியின் உதுமானியப் பேரரசு
1918–1920, பிரித்தானிய மற்றும் பிரான்சுப் படைகள் கைப்பற்றுதல் ^[18]
1920 மார்ச் – சூலை, சிரியாவின் அரபு இராச்சியம்
1920–1924, தமாசுக்கசு இராச்சியம், பிரான்சு காலனியாதிக்கத்தில்
1924–1946, பிரான்சு காலனியாதிக்கத்தில் சிரியா மற்றும் லெபனான்^[19]
1946–1958, சிரியாக் குடியரசில்
1958–1960, ஐக்கிய அரபுக் குடியரசில்
1960– தற்போது வரை, சிரியா குடியரசில்

பண்டைய தமாசுக்கசு நகரத்தின் தொன்மையான இடங்கள்

பண்டைய தமாசுக்கசு தெருக் காட்சி
அல்- ஹமிதயா சதுக்கம்
ஜுபிடர் கோயிலின் இடிபாடுகள், அல்- ஹமிதயா சதுக்கம்
அசம் அரண்மனை
புனித அனானியவின் வழிபாட்டிடம்
மரியம் தேவாலயம்
உமயத்து மசூதி
பண்டைய தமாசுக்கசு நகரத்தின் குறுகலான தெரு

பண்டைய தமாசுக்கசு நகரத்தின் தற்போதைய நிலை

யுனெஸ்கோ நிறுவனத்தின் பரிந்துரையின் பேரில்,^[20] பண்டைய தமாசுக்கசு நகரத்தின் அழிவு நிலையில் உள்ள தொல்லியல் களங்களை, அழிவு நிலையில் உள்ள உலகப் பாரம்பரியக் களங்களாக அறிவித்துள்ளது.^[21]^[22]