မာရဝိဇယဗုဒ္ဓရုပ်ပွားတော်
မာရဝိဇယဗုဒ္ဓရုပ်ပွားတော် သည် ၈၁ ပေ (၂၅ မီတာ) ရှိသော ဘူမိဖဿမုဒြာ စကျင်ကျောက် ရုပ်ပွားတော်ဖြစ်ပြီး မြန်မာနိုင်ငံ၏ မြို့တော် နေပြည်တော်၊ ဒက္ခိဏသီရိမြို့နယ်ရှိ ဗုဒ္ဓဥယျာဉ်တော်တွင် တည်ရှိသည်။[၁] ရုပ်ပွားတော်သည် စကျင်ကျောက်သားဖြင့် ထုလုပ်ပူဇော်ထားခြင်းဖြစ်ပြီး မြန်မာနိုင်ငံရှိ စကျင်ကျောက်သားရုပ်ပွားတော်များထဲမှ ကမ္ဘာ့အမြင့်ဆုံး နှင့်အလေးချိန်အများဆုံး ရုပ်ပွားတော် တစ်ဆူဖြစ်သည်။[၂] မန္တလေးတိုင်းဒေသကြီး၊ မတ္တရာမြို့နယ်၊ စကျင်တောင်မှ ထွက်ရှိသော စကျင်ကျောက်ဖြင့် ထွင်းထုထားသော ရုပ်ပွားတော်အလေးချိန်မှာ ၁,၇၈၂ တန်နှင့် ပလ္လင်တော် အလေးချိန်မှာ ၃,၅၁၀တန်၊ စုစုပေါင်းအလေးချိန် ၅,၂၉၂ တန် ရှိသည်။[၃][၄] ရုပ်ပွားတော်၏ ဉာဏ်တော်အမြင့်မှာ ၆၃ ပေ ရှိပြီး ပလ္လင်တော်အမြင့်မှာ ၁၈ ပေရှိသည်။ ထိုအတိုင်းအတာ ပမာဏကိန်းများကို တစ်လုံးတည်းရအောင် ပေါင်းကြည့်ပါက ၉ ဂဏန်းရကြောင်း တွေ့ရသည်။[၅][၆] ရုပ်ပွားတော်သည် ကျောက်စာများ၊ စေတီငယ်များ၊ သာသနာအဆောက်အဦများနှင့် မုစလိန္နာအိုင်တို့ပါဝင်သော ၉၁ ဟက်တာကျယ်ဝန်းသည့် ပရိဂုဏ်အတွင်းတည်ရှိသည်။[၇] သမိုင်းကြောင်းရုပ်ပွားတော် တည်ဆောက်ခြင်းလုပ်ငန်းများကို ၂၀၂၀ ပြည့်နှစ် ဇွန်လ ၁၄ ရက်နေ့တွင် စတင်ခဲ့ပြီး[၈] ၂၀၂၁ ခုနှစ် တွင် နိုင်ငံပိုင် သတင်းစာနှင့် မြန်မာ့ရုပ်မြင်သံကြားများတွင် ကြေညာခဲ့သည်။[၉] ရုပ်ပွားတော်၏ ဘွဲ့အမည် မာရဝိဇယ ဖြစ်သည်။ မာရဝိဇယ ဆိုသည်မှာ "မာရ်နတ်ကို အောင်မြင်ခြင်း" သို့မဟုတ် " မာရ်ငါးပါးကိုအောင်မြင်ခြင်း " ဟူ၍ အဓိပ္ပာယ်ရသည်။[၇] အမေရိကန်ဒေါ်လာ ၂၇.၆ သန်းကျော်ကုန်ကျသည့် တည်ဆောက်ဆဲ လုပ်ငန်းခွင်အား အများပြည်သူမှ လှူဒါန်းမှုများ ပြုလုပ်နိုင်ရန်အတွက် နိုင်ငံပိုင်သတင်းစာများကို အသုံးချခဲ့သည်။[၁၀][၈] အဆိုပါရုပ်ပွားတော် တည်ဆောက်ခြင်းအတွက် စစ်ကောင်စီနှင့် နီးစပ်သော စီးပွားရေးသမားများအပါအဝင် အငြိမ်းစားစစ်ဖက်ဆိုင်ရာများက ကျပ်ငွေ ၃၃ ဘီလီယံကျော် (အမေရိကန်ဒေါ်လာ ၁၀ သန်းခန့်)ကို ထည့်ဝင်လှူဒါန်းခဲ့သည်။[၁၁][၁၂][၇] ရုပ်ပွားတော်တည်ဆောက်ရာတွင် ပလ္လင်တော်အပိုင်း၊ တင်ပလ္လင်ခွေအပိုင်း ၊ ကိုယ်လုံးတော်ပိုင်း နှင့် ဦးခေါင်းတော်အပိုင်း ဟူ၍ အပိုင်း (၄) ပိုင်းခွဲကာ တည်ဆောက်ခဲ့သည်။ တည်ဆောက်ချိန် တစ်နှစ်ကျော်ကြာမြင့်ခဲ့သည်။ ထူးခြားချက်မှာ ဘုရားဘွဲတော် နှင့် ဘုရားတည်သည်အချိန်မှ ပြီးစီးသည်အထိ ဂဏန်းများသည် ပေါင်းခြင်း ၉ ရလေ၏။ ၂၀၂၃ ခုနှစ် မတ်လတွင် ရုပ်ပွားတော်၏ မျက်လုံးအောက်တွင် အစင်းကြောင်းများပေါ်ကာ မျက်ရည်ကျသကဲ့သို့ ဖြစ်ပေါ်ခဲ့သဖြင့် အဝတ်များဖြင့် ကာရံကာ ပြန်လည်ပြုပြင်ခဲ့ရကာ ဘုရားဖူးခွင့်၊ ဓာတ်ပုံရိုက်ခွင့်များ ပိတ်ပင်ခဲ့သည်။[၁၃][၁၄] ၂၀၂၃ ခုနှစ် ဩဂုတ်လ ၁ ရက်နေ့၊ မြန်မာသက္ကရာဇ် ၁၃၈၅ ခုနှစ် ၊ ဒုတိယ ဝါဆိုလပြည့် ဓမ္မစကြာနေ့တွင် ရုပ်ပွားတော်အား ကမ္ဘာ့နိုင်ငံအသီးသီးမှ ဆရာတော်များ၊ ထိုင်းနိုင်ငံမှ ဗြဟ္မဝဇိရရံသီဆရာတော် အပါအဝင် သံဃာတော် အပါး ၉၀၀ မှ ဗုဒ္ဓါဘိသေက အနေကဇာတင်ခြင်းအခမ်းအနားကို ပြုလုပ်ခဲ့သည်။[၈] ရေစက်ချအခမ်းအနားတွင် ကျောက်မဲဆရာတော် ဒေါက်တာ ဘဒ္ဒန္တ စန္ဒနသာရက လက်သုံးချောင်းထောင်ကာ ဗုဒ္ဓ၏ အဆုံးအမသုံးချက်ကို ဟောပြောခဲ့သည်။[၁၅] ထိုနေ့မှာပင် ဗိုလ်ချုပ်မှူးကြီး မင်းအောင်လှိုင်က သာသနာရေးနှင့် ယဉ်ကျေးမှုဝန်ကြီး ဦးကိုကိုအား ကျန်းမာရေးအကြောင်းပြချက်ဖြင့် ရာထူးမှ အနားယူခွင့်ပြုခဲ့သည်။[၁၅] ကိုးကား
|
||||||||||||||||||||||||||||
Portal di Ensiklopedia Dunia
