பெட்டாலிங் ஜெயா மாநகரத்தின் பிரிவுகள் அனைத்தும் எண்கள் இடப்பட்ட பிரிவுகளாகப் பிரிக்கப்பட்டு உள்ளன. ஒவ்வொரு பிரிவும் செக்சன் (மலாய்: Seksyen; ஆங்கிலம்: Section); என்று அழைக்கப்படுகிறது.
அதே போல பெட்டாலிங் ஜெயா மாநகரத்தில் உள்ள பெரும்பாலான சாலைகளுக்கும் எண்களில் பெயர் வைக்கப்பட்டு உள்ளன. அந்தப் பிரிவுகளில் நகர்ப்புறங்கள்; வீட்டுமனைத் திட்டங்கள்; வணிக வளாகங்கள் உருவாக்கப்பட்டு உள்ளன. அவற்றுக்கும் எண்களிலேயே பெயர்கள் வைக்கப்பட்டு உள்ளன.
பொது
பெட்டாலிங் ஜெயா நகரப் பிரிவுகள்
1952-ஆம் ஆண்டில் பெட்டாலிங் ஜெயாவில் முதல் குடியேற்றம் நடைபெற்றது. பெட்டாலிங் ஜெயா பழைய நகரம் என்று தற்சமயம் அழைக்கப்படும் இடத்தில் எப்பிங்காம் ரப்பர் தோட்டம் (Effingham Estate) இருந்தது. அந்த ரப்பர் தோட்டத்தில், 1,200 ஏக்கர் (486 எக்டர்) பரப்பளவில், மூன்று புதியக் குடியேற்றப் பகுதிகள் உருவாக்கப்பட்டன.[1]
முதல் குடியேற்றப் பகுதிகள்
அந்த குடியேற்றப் பகுதிகளுக்கு பிரிவு 1 (Section 1); பிரிவு 2 (Section 2) என்று பெயர் வைக்கப் பட்டன. பின்னர் 1954-ஆம் ஆண்டு இரண்டாவது குடியேற்றம் நடைபெற்றது. அந்தக் குடியேற்றப் பகுதிக்கு பிரிவு 3 (Section 3) என்று பெயர் வைக்கப் பட்டது. இந்தப் பகுதி மலாய்க்காரர்களுக்குத் தனியாக ஒதுக்கித் தரப்பட்டது.
அப்போது தொடங்கிய அந்த எண் பிரிவு முறை இன்றும் தொடர்கிறது. இந்த எண் முறைமை பெட்டாலிங் ஜெயா பழைய நகரத்தில் தொடங்கப் பட்டதால் பிரிவு 1 (Section 1)-இல் இருந்து பிரிவு 4 (Section 4) வரையிலான பிரிவுகள் அங்குதான் உள்ளன.[2]
