Беларуска-руандыйскія адносіны

Беларуска-руандыйскія адносіны — двухбаковыя дыпламатычныя адносіны Беларусі і Руанды, устаноўленыя 27 кастрычніка 1993 года^[1].

У 2014 годзе паслы Руанды і Беларусі ў Расіі падпісалі дакументы аб узаемадзеянні ў гандлі і фарміраванні дагаворна-прававой базы^[2].

Аб’ём двухбаковага гандлю моцна вагаўся па гадах. Так, у 2014 годзе беларускія пастаўкі ў Руанду былі на суму 9,9 тысяч долараў^[3]. У 2015 годзе беларускія пастаўкі ў Руанду склалі 1230,9 тысяч, а руандыйскія пастаўкі ў Беларусь — 32,5 тысячы^[3]. З Руанды Беларусь імпартавала каву^[4]. Таксама з Руанды ў асобныя гады ў Беларусь пастаўляліся садавіна і арэхі, раслінная сыравіна, алкагольныя напоі, мыла, алюміній і адзенне^[4]. У 2015 годзе Беларусь пачала экспарт угнаенняў у Руанду, які склаў 98% паставак^[4]. У асобныя гады ў Руанду пастаўляліся іншыя тавары. Так, у 2001 годзе пастаўляўся тэкстыль, а ў 2014 годзе былі пастаўленыя электрычныя машыны і апараты^[4].