Беларуска-інданезійскія адносіны

Беларуска-інданезійскія адносіны — двухбаковыя дыпламатычныя адносіны паміж Беларуссю і Інданезіяй, устаноўленыя 18 чэрвеня 1993 года.

Дыпламатычныя адносіны паміж дзвюма краінамі былі ўсталяваныя 18 чэрвеня 1993 года^[1].

У 2008 годзе была заключана дамоўленасць аб стварэнні Міжурадавай беларуска-інданезійскай камісіі па гандлёвым, эканамічным, навуковым і тэхнічным супрацоўніцтве^[2].

У жніўні 2011 года ў Джакарце адкрыта пасольства Беларусі^[2], першым паслом стаў Уладзімір Лапата-Загорскі^[3]. 18—20 сакавіка 2013 года беларускі лідар А. Р. Лукашэнка наведаў Інданезію з дзяржаўным візітам^[1].

У верасні 2015 года ўлады Інданезіі вырашылі ўсталяваць бязвізавы рэжым для турыстычных паездак грамадзян Беларусі працягласцю да 30 дзён^[1].

Тавараабарот паміж Беларуссю і Інданезіяй павялічыўся з 1995 года па 2014 год з 1,8 млн долараў да 220 млн долараў^[4]. У далейшым тавараабарот знізіўся і ў 2021 годзе склаў 35,6 млн долараў^[5].

У 2000 годзе паміж урадамі дзвюх краін было падпісана гандлёвае пагадненне^[1]. У 2012 годзе пачаліся абмежаваныя пастаўкі прадукцыі Беларускага аўтамабільнага завода^[2].

У 2013 годзе Інданезія падпісала праграму беларуска-інданезійскага навукова-тэхнічнага супрацоўніцтва^[4].