Рајнер Вајс

Рајнер Вајс
*Rainer Weiss*
Рајнер Вајс; Rainer Weiss
	Рајнер Вајс во 2006 година
Роден(а)	29 септември 1932 (92 г.); Берлин, Вајмарска Република
Живеалиште	САД
Полиња	Физика ; Ласерска физика ; Експериментална физика
Установи	Масачусетски технолошки институт
Образование	Масачусетски технолошки институт;
Теза	„Штарков ефект и хиперфина структура на флуороводородот“ (1962)
Докторски ментор	Џеролд Захаријас
Поважни награди	Ајнштајнова награда(2007); Специјална награда за фундаментална физика (2016); Груберова награда за космологија (2016); Шоова награда (2016); Кавлиева награда (2016); Харвејева награда (2016); Награда на принцезата од Астурија (2017); Нобелова награда за физика (2017);

Рајнер Вајс (германски: Rainer Weiss); (Берлин, 29 септември 1932) - американски физичар од германско потекло на полето на гравитациската физика и астрофизиката. Во 2017 година ја добил Нобеловата награда за физика заедно со Кип Торн и Бери Бериш за „решителниот придонес за ЛИГО детекторот и опсервациите на гравитациските бранови“^[1]^[2]^[3]^[4].

Животопис

Рајнер Вајс е роден на 29 септември 1932 година во Берлин, Вајмарска Република (денешна Германија) од мајка Гетруда Леснер и татко Фредерик А. Вајс^[5]^[6]. Неговата мајка, христијанка, била глумица^[7]. Неговиот татко, физичар, невролог и психоаналитичар бил протеран од Германија од нацистите бидејќи имал еврејско потекло и бил активен член на Комунистичката партија на Германија. Семејството прво побегнало во Прага, а по германската окупација на Чехословачка во 1938 година, во САД^[8].

Образование

Вајс младоста ја поминал во Њујорк каде го завршил средното образование. Студирал на МТИ, при што изгубил првата година^[9] и дипломирал во 1955 година . Таму и докторирал во 1962 година, а ментор му бил Џеролд Захаријас.