தமிழ்நாட்டின் மாவட்டங்கள்

தமிழக மாவட்டங்கள்
வகை	மாவட்டங்கள்
அமைவிடம்	தமிழ்நாடு
எண்ணிக்கை	38 மாவட்டங்கள்
மக்கள்தொகை	பெரம்பலூர் – 565,223 (குறைவு); சென்னை – 4,646,732 (அதிகம்)
பரப்புகள்	426 km2 (164 sq mi) சென்னை (சிறியது) – 6,266.64 km2 (2,419.56 sq mi) திண்டுக்கல் (பெரியது)
அரசு	தமிழ்நாடு அரசு
உட்பிரிவுகள்	தாலுகாக்கள், வருவாய் கிராமங்கள்

இந்தியாவின், தமிழ்நாடு மாநிலத்தில், 38 மாவட்டங்கள் உள்ளன. ஒவ்வொரு மாவட்டத்திலும் இந்திய ஆட்சிப்பணி அலுவலர் ஒருவர் மாவட்ட ஆட்சியராக நியமிக்கப்பட்டு, அவரது தலைமையில் மாவட்ட நிர்வாகப் பணிகள் கவனிக்கப்படுகின்றன. தமிழ்நாட்டிலுள்ள மாவட்டங்களின் தலைநகரங்களின் பெயரிலேயே பெரும்பாலும் மாவட்டங்களின் பெயரும் அமையப் பெற்றுள்ளன. இவற்றுள் விதிவிலக்காக, கன்னியாகுமரி மாவட்டத்தின் தலைநகர் நாகர்கோவில், நீலகிரி மாவட்டத்தின் தலைநகர் உதகமண்டலம் என்றுள்ளன. தற்போதுள்ள மாவட்டங்கள் பல்வேறு காலகட்டங்களில் பல்வேறு விதமாக பெயர் மாற்றம் பெற்றுவந்துள்ளன. ஒரு சில காலகட்டங்களில் மாவட்டங்களின் பெயருடன் காலம் சென்ற தமிழ்நாட்டின் தலைவர்கள் பெயரும் இணைத்துப் பெயரிடப்பட்டு அழைக்கப்பட்டு வந்தன. தற்போது அப்பெயர்கள் நீக்கப்பட்டு, மாவட்டங்களின் பெயர்கள் மட்டும் நிலைத்து நிற்கின்றன.

வரலாறு

1947 ஆகத்து மாதம் இந்திய விடுதலை பெற்ற பின்னர், பிரித்தானிய இந்தியாவின் சென்னை மாகாணமானது, சென்னை மாநிலம் என, பெயர் மாற்றம் செய்யப்பட்டது. 1953 முதல் 1956 வரையிலான மாநில எல்லைகள் சீரமைப்புகளின் வாயிலாக தற்போதைய எல்லைகள் உருவாக்கப்பட்டன. சென்னை மாநிலமானது, 1969ஆம் ஆண்டில் அதிகாரப்பூர்வமாக, தமிழ்நாடு என மறுபெயரிடப்பட்டது. முந்தைய சென்னை மாகாணமானது 13 மாவட்டங்களாகப் பிரிக்கப்பட்டிருந்தது. அவை: செங்கல்பட்டு, கோயம்புத்தூர், கன்னியாகுமரி, மெட்ராஸ், மதுரை, நீலகிரி, வட ஆற்காடு, இராமநாதபுரம், சேலம், தென் ஆற்காடு, தஞ்சாவூர், திருச்சிராப்பள்ளி, திருநெல்வேலி ஆகியனவாகும். இம்மாவட்டங்கள் கீழ்க்காணும் வகையில் பிரிக்கப்பட்டு, தற்போதைய புதிய மாவட்டங்கள் உருவாக்கப்பட்டன.^[1]

1966: சேலம் மாவட்டத்தைப் பிரித்து தருமபுரி மாவட்டம் உருவாக்கப்பட்டது.
1974: திருச்சிராப்பள்ளி மாவட்டத்தைப் பிரித்து புதுக்கோட்டை மாவட்டம் உருவாக்கப்பட்டது.
1979: கோயம்புத்தூர் மாவட்டத்தைப் பிரித்து ஈரோடு மாவட்டம் உருவாக்கப்பட்டது.
1985: மதுரை மற்றும் இராமநாதபுரம் மாவட்டங்களைப் பிரித்து, புதிதாக சிவகங்கை, விருதுநகர் மாவட்டங்கள் உருவாக்கப்பட்டன.
1985: மதுரை மாவட்டத்தைப் பிரித்து திண்டுக்கல் மாவட்டம் உருவாக்கப்பட்டது.
1986: திருநெல்வேலி மாவட்டத்தைப் பிரித்து தூத்துக்குடி மாவட்டம் உருவாக்கப்பட்டது.
1989: வட ஆற்காடு மாவட்டத்தைப் பிரித்து, புதிதாக வேலூர், திருவண்ணாமலை மாவட்டங்கள் உருவாக்கப்பட்டன.
1991: தஞ்சாவூர் மாவட்டத்தைப் பிரித்து, புதிதாக நாகப்பட்டினம், திருவாரூர் மாவட்டங்கள் உருவாக்கப்பட்டன.
1993: தென் ஆற்காடு மாவட்டம், புதிதாக விழுப்புரம், கடலூர் ஆகிய இரு மாவட்டங்களாகப் பிரிக்கப்பட்டது.
1995: திருச்சிராப்பள்ளி மாவட்டத்தைப் பிரித்து, புதிதாக கரூர், பெரம்பலூர் மாவட்டங்கள் உருவாக்கப்பட்டன.
1996: மதுரை மாவட்டத்தைப் பிரித்து, புதிதாக தேனி மாவட்டம் உருவாக்கப்பட்டது.
1997: சேலம் மாவட்டத்தைப் பிரித்து, புதிதாக நாமக்கல் மாவட்டம் உருவாக்கப்பட்டது.
1997: முந்தைய செங்கல்பட்டு மாவட்டமானது, காஞ்சிபுரம், திருவள்ளூர் ஆகிய இரு மாவட்டங்களாகப் பிரிக்கப்பட்டது.
2004: தர்மபுரி மாவட்டத்திலிருந்து புதிதாக கிருட்டிணகிரி மாவட்டம் உருவாக்கப்பட்டது.
2007: பெரம்பலூர் மாவட்டத்தைப் பிரித்து, புதிதாக அரியலூர் மாவட்டம் உருவாக்கப்பட்டது.
2009: கோயம்புத்தூர் மற்றும் ஈரோடு மாவட்டங்களிலிருந்து சில பகுதிகள் பிரிக்கப்பட்டு, புதிதாக திருப்பூர் மாவட்டம் உருவாக்கப்பட்டது.
2019: விழுப்புரம் மாவட்டத்தைப் பிரித்து, புதிதாக கள்ளக்குறிச்சி மாவட்டம், (2019, சனவரி 8 ஆம் நாள் விழுப்புரம் மாவட்டத்திலிருந்து பிரித்து, தமிழ்நாட்டின் 33 வது மாவட்டமாக, கள்ளக்குறிச்சி மாவட்டம் அறிவிக்கப்பட்டுள்ளது); மற்றும் காஞ்சிபுரம் மாவட்டத்தைப் பிரித்து, புதிதாக செங்கல்பட்டு மாவட்டமும் (2019 ஆம் ஆண்டு சூலை மாதம் 18 ஆம் தேதி காஞ்சிபுரம் மாவட்டத்திலிருந்து பிரிக்கப்பட்டது); மற்றும் திருநெல்வேலி மாவட்டத்தைப் பிரித்து, புதிதாக தென்காசி மாவட்டமும் 2019 ஆம் ஆண்டு சூலை மாதம் 18 ஆம் தேதி உருவாக்கப்பட்டது. வேலூர் மாவட்டத்தைப் பிரித்து, புதியதாக திருப்பத்தூர் மாவட்டமும் மற்றும் இராணிப்பேட்டை மாவட்டமும் 2019 ஆம் ஆண்டு ஆகத்து மாதம் 15 ஆம் தேதி உருவாக்கப்பட்டன.^[2]^[3]^[4]
2020: நாகப்பட்டினம் மாவட்டத்திலிருந்து புதியதாக மயிலாடுதுறை மாவட்டம் ஆனது மார்ச் 24, 2020 அன்று உருவாக்கப்பட்டது.^[5]^[6]

மாவட்டங்கள் பட்டியல்

மண்டல வாரியாக

வடக்கு (தொண்டை மண்டலம்)

மத்திய (சோழ மண்டலம்)

மேற்கு (கொங்கு மண்டலம்)

தெற்கு (பாண்டிய மண்டலம்)

அட்டவணை

2011 ஆண்டு மக்கட்தொகை கணக்கெடுப்பின்படி தமிழ்நாட்டின் மக்கட் தொகை 7,21,38,958 ஆகும். இதில் அதிக மக்கள்தொகை உள்ள மாவட்டமாக சென்னை மாவட்டம் உள்ளது. இங்கு அதிகபட்சமாக 46,81,087 பேர் வசித்து வருகின்றனர். இம்மாவட்டத்தின் மக்கட்தொகை அடர்த்தி ஒரு ச.கி.மீ.க்கு 26,903 ஆக இருக்கிறது. மாநிலத்தின் மக்கள் அடர்த்தி மிகக் குறைவாக உள்ள மாவட்டம், நீலகிரி மாவட்டம் ஆகும் (ஒரு ச.கி.மீ.க்கு 288 பேர்). கல்வியறிவில் கன்னியாகுமரி மாவட்டம் முதன்மையாக உள்ளது. இங்கு மாவட்டத்தின் 92.14% பேர் கல்வி அறிவு பெற்றவர்களாக உள்ளனர். கல்வியறிவில் 64.71% பெற்று, தருமபுரி மாவட்டம் கடைசி நிலையில் உள்ளது.^[7] கீழே உள்ள அட்டவணையில், அனைத்து 38 மாவட்டங்களுக்கான புவியியல் மற்றும் மக்கட்தொகை அளவுருக்கள் பட்டியலிடப்பட்டிருக்கின்றன.^[8]

எண்.	மாவட்டம்	குறியீடு	தலைநகரம்	நிறுவப்பட்டது	முந்தைய மாவட்டம்	பரப்பளவு (கி.மீ²)	மக்கள் தொகை (2011 கணக்கெடுப்பின் படி)		தாலுகா/வட்டம்^[9]	வரைபடம்
எண்.	மாவட்டம்	குறியீடு	தலைநகரம்	நிறுவப்பட்டது	முந்தைய மாவட்டம்	பரப்பளவு (கி.மீ²)	மக்கள் தொகை^[10]	மக்கள் தொகை அடர்த்தி (/கி.மீ²)	தாலுகா/வட்டம்^[9]	வரைபடம்
1.	அரியலூர்	AR	அரியலூர்	23 நவம்பர் 2007	பெரம்பலூர்	1949.31	7,54,894	390	ஆண்டிமடம் அரியலூர் உடையார்பாளையம் செந்துறை
2.	செங்கல்பட்டு	CGL	செங்கல்பட்டு	29 நவம்பர் 2019	காஞ்சிபுரம்	2,944.96	2,556,244	868	செங்கல்பட்டு செய்யூர் மதுராந்தகம் பல்லாவரம் தாம்பரம் திருப்போரூர் திருக்கழுகுன்றம் வண்டலூர்
3.	சென்னை	CH	சென்னை	1 நவம்பர் 1956	ஆரம்பகால 13 மாவட்டங்களுள் ஒன்று	426	4,646,732	26,076	ஆலந்தூர் அம்பத்தூர் அமைந்தக்கரை அயனாவரம் எழும்பூர் கிண்டி வட்டம் மதுரவாயல் மயிலாப்பூர் மாதவரம் மாம்பலம் பெரம்பூர் வட்டம் புரசைவாக்கம் சோழிங்கநல்லூர் தண்டையார்பேட்டை திருவொற்றியூர் வேளச்சேரி
4.	கோயம்புத்தூர்	CO	கோயம்புத்தூர்	1 நவம்பர் 1956	ஆரம்பகால 13 மாவட்டங்களுள் ஒன்று	4,723^[11]	3,458,045	732	ஆனைமலை அன்னூர் கிணத்துக்கடவு கோயம்புத்தூர் வடக்கு கோயம்புத்தூர் தெற்கு மதுக்கரை மேட்டுப்பாளையம் பேரூர் பொள்ளாச்சி சூலூர் வால்பாறை
5.	கடலூர்	CU	கடலூர்	30 செப்டம்பர் 1993	தென் ஆற்காடு	3,678	2,605,914	709	புவனகிரி சிதம்பரம் கடலூர் காட்டுமன்னார்கோயில் குறிஞ்சிப்பாடி பண்ருட்டி ஸ்ரீமுஷ்ணம் திட்டக்குடி வேப்பூர் விருத்தாச்சலம்
6.	தருமபுரி	DH	தருமபுரி	2 அக்டோபர் 1965	சேலம்	4,497.77	15,06,843	335	தருமபுரி பாலக்கோடு பென்னாகரம் அரூர் பாப்பிரெட்டிப்பட்டி காரிமங்கலம் நல்லம்பள்ளி
7.	திண்டுக்கல்	DI	திண்டுக்கல்	15 செப்டம்பர் 1985	மதுரை	6,266.64	21,59,775	345	ஆத்தூர் திண்டுக்கல் மேற்கு திண்டுக்கல் கிழக்கு குஜிலியம்பாறை கொடைக்கானல் நத்தம் நிலக்கோட்டை ஒட்டன்சத்திரம் பழனி வேடசந்தூர்
8.	ஈரோடு	ER	ஈரோடு	31 ஆகத்து 1979	கோயம்புத்தூர்	5,722^[12]	22,51,744	394	அந்தியூர் பவானி ஈரோடு கோபிச்செட்டிப்பாளையம் கொடுமுடி மொடக்குறிச்சி நம்பியூர் பெருந்துறை சத்தியமங்கலம் தாளவாடி
9.	கள்ளக்குறிச்சி	KL	கள்ளக்குறிச்சி	26 நவம்பர் 2019	விழுப்புரம்	3,520.37	13,70,281	389	கள்ளக்குறிச்சி திருக்கோயிலூர் கல்வராயன்மலை உளுந்தூர்பேட்டை சங்கரபுரம் சின்னசேலம்
10.	காஞ்சிபுரம்	KC	காஞ்சிபுரம்	1 சூலை 1997	செங்கல்பட்டு (சென்னை மாகாணம்)	1,655.94	11,66,401	704	காஞ்சிபுரம் ஸ்ரீபெரும்புதூர் உத்திரமேரூர் வாலாஜாபாத் குன்றத்தூர்
11.	கன்னியாகுமரி	KK	நாகர்கோவில்	1 நவம்பர் 1956	ஆரம்பகால 13 மாவட்டங்களுள் ஒன்று	1,672	18,70,374	1,119	அகத்தீஸ்வரம் கல்குளம் விளவங்கோடு தோவாளை திருவட்டாறு கிள்ளியூர்
12.	கரூர்	KR	கரூர்	30 செப்டம்பர் 1995	திருச்சிராப்பள்ளி	2,895.57	10,64,493	357	அரவக்குறிச்சி கடவூர் கரூர் கிருஷ்ணராயபுரம் குளித்தலை மண்மங்கலம் புகளூர்
13.	கிருட்டிணகிரி	KR	கிருட்டிணகிரி	9 பிப்ரவரி 2004	தருமபுரி	5,143	18,79,809	366	கிருஷ்ணகிரி ஓசூர் போச்சம்பள்ளி ஊத்தங்கரை தேன்கனிக்கோட்டை அஞ்செட்டி சூளகிரி பர்கூர்
14.	மதுரை	MDU	மதுரை	1 நவம்பர் 1956	ஆரம்பகால 13 மாவட்டங்களுள் ஒன்று	3,741.73	30,38,252	812	மதுரை வடக்கு மதுரை தெற்கு மதுரை மேற்கு மதுரை கிழக்கு கள்ளிக்குடி மேலூர் பேரையூர் திருமங்கலம் திருப்பரங்குன்றம் உசிலம்பட்டி வாடிப்பட்டி
15.	மயிலாடுதுறை	–	மயிலாடுதுறை	7 ஏப்ரல் 2020	நாகப்பட்டினம்	1,172	9,18,356	784	மயிலாடுதுறை சீர்காழி தரங்கம்பாடி குத்தாலம்
16.	நாகப்பட்டினம்	NG	நாகப்பட்டினம்	18 அக்டோபர் 1991	தஞ்சாவூர்	1,397	6,97,069	498	கீழ்வேலூர் நாகப்பட்டினம் திருக்குவளை வேதாரண்யம்
17.	நாமக்கல்	NM	நாமக்கல்	1 சனவரி 1997	சேலம்	3,363	17,26,601	513	கொல்லிமலை மோகனூர் நாமக்கல் பரமத்தி-வேலூர் சேந்தமங்கலம் திருச்செங்கோடு இராசிபுரம் குமாரபாளையம்
18.	நீலகிரி	NI	உதகமண்டலம்	1 நவம்பர் 1956	ஆரம்பகால 13 மாவட்டங்களுள் ஒன்று	2,452.5	7,35,394	300	குன்னூர் கூடலூர் கோத்தகிரி குந்தா பந்தலூர் உதகமண்டலம்
19.	பெரம்பலூர்	PE	பெரம்பலூர்	30 செப்டம்பர் 1995	திருச்சிராப்பள்ளி	1,752	5,65,223	320	ஆலத்தூர் குன்னம் பெரம்பலூர் வேப்பந்தட்டை
20.	புதுக்கோட்டை	PU	புதுக்கோட்டை	14 சனவரி 1974	தஞ்சாவூர் மற்றும் திருச்சிராப்பள்ளி	4,663	16,18,345	347	ஆலங்குடி அறந்தாங்கி ஆவுடையார்கோயில் கந்தர்வக்கோட்டை இலுப்பூர் கறம்பக்குடி குளத்தூர் மணமேல்குடி புதுக்கோட்டை திருமயம் பொன்னமராவதி விராலிமலை
21.	இராமநாதபுரம்	RA	இராமநாதபுரம்	1 நவம்பர் 1956	ஆரம்பகால 13 மாவட்டங்களுள் ஒன்று	4,089.57	13,53,445	331	கடலாடி கமுதி கீழக்கரை முதுகுளத்தூர் பரமக்குடி இராமநாதபுரம் இராமேஸ்வரம் திருவாடானை இராஜசிங்கமங்கலம்
22.	இராணிப்பேட்டை	RN	இராணிப்பேட்டை	28 நவம்பர் 2019	வேலூர்	2,234.32	12,10,277	542	அரக்கோணம் ஆற்காடு நெமிலி வாலாஜாபேட்டை சோளிங்கர் கலவை
23.	சேலம்	SA	சேலம்	1 நவம்பர் 1956	ஆரம்பகால 13 மாவட்டங்களுள் ஒன்று	5,205	34,82,056	669	ஆத்தூர் எடப்பாடி கெங்கவல்லி காடையாம்பட்டி மேட்டூர் ஓமலூர் பெத்தநாயக்கன்பாளையம் சேலம் சேலம் மேற்கு சேலம் தெற்கு சங்ககிரி வாழப்பாடி ஏற்காடு
24.	சிவகங்கை	SI	சிவகங்கை	15 மார்ச் 1985	மதுரை மற்றும் இராமநாதபுரம்	4,086	13,39,101	328	தேவகோட்டை இளையான்குடி காளையார்கோவில் காரைக்குடி மானாமதுரை சிவகங்கை சிங்கம்புணரி திருப்பத்தூர் திருப்புவனம்
25.	தென்காசி	TS	தென்காசி	22 நவம்பர் 2019	திருநெல்வேலி	2916.13	14,07,627	483	ஆலங்குளம் கடையநல்லூர் செங்கோட்டை சங்கரன்கோயில் சிவகிரி தென்காசி திருவேங்கடம் வீரகேரளம்புதூர்
26.	தஞ்சாவூர்	TJ	தஞ்சாவூர்	1 நவம்பர் 1956	ஆரம்பகால 13 மாவட்டங்களுள் ஒன்று	3,396.57	24,05,890	708	பூதலூர் கும்பகோணம் ஒரத்தநாடு பாபநாசம் பட்டுக்கோட்டை பேராவூரணி தஞ்சாவூர் திருவையாறு திருவிடைமருதூர்
27.	தேனி	TH	தேனி	25 சூலை 1996	மதுரை	3,066	12,45,899	406	தேனி பெரியகுளம் ஆண்டிபட்டி போடிநாயக்கனூர் உத்தமபாளையம்
28.	தூத்துக்குடி	TK	தூத்துக்குடி	20 அக்டோபர் 1986	திருநெல்வேலி	4,621	17,50,176	379	தூத்துக்குடி ஸ்ரீவைகுண்டம் கோவில்பட்டி ஒட்டபிடாரம் எட்டையபுரம் விளாத்திக்குளம் கயத்தாறு திருச்செந்தூர் சாத்தான்குளம் ஏரல்
29.	திருச்சிராப்பள்ளி	TC	திருச்சிராப்பள்ளி	1 நவம்பர் 1956	ஆரம்பகால 13 மாவட்டங்களுள் ஒன்று	4,407	27,22,290	618	இலால்குடி மணச்சநல்லூர் மணப்பாறை மருங்காபுரி முசிறி திருவரங்கம் திருச்சிராப்பள்ளி மேற்கு திருச்சிராப்பள்ளி கிழக்கு திருவெறும்பூர் தொட்டியம் துறையூர்
30.	திருநெல்வேலி	TI	திருநெல்வேலி	1 நவம்பர் 1956	ஆரம்பகால 13 மாவட்டங்களுள் ஒன்று	3842.37	16,65,253	433	அம்பாசமுத்திரம் நான்குநேரி பாளையங்கோட்டை மானூர் இராதாபுரம் திருநெல்வேலி திசையன்விளை சேரன்மாதேவி
31.	திருப்பத்தூர்	TU	திருப்பத்தூர்	28 நவம்பர் 2019	வேலூர்	1,797.92	11,11,812	618	நாட்டறம்பள்ளி வட்டம் திருப்பத்தூர் வாணியம்பாடி ஆம்பூர்
32.	திருப்பூர்	TP	திருப்பூர்	22 பிப்ரவரி 2009	கோயம்புத்தூர் மற்றும் ஈரோடு	5,186.34	24,79,052	478	அவிநாசி பல்லடம் தாராபுரம் காங்கேயம் மடத்துக்குளம் திருப்பூர் தெற்கு திருப்பூர் வடக்கு உடுமலைப்பேட்டை ஊத்துக்குளி
33.	திருவள்ளூர்	TL	திருவள்ளூர்	1 சூலை 1997	செங்கல்பட்டு	3424	37,28,104	1,089	ஆவடி கும்மிடிப்பூண்டி பள்ளிப்பட்டு பொன்னேரி பூந்தமல்லி ஆர். கே. பேட்டை திருத்தணி திருவள்ளூர் ஊத்துக்கோட்டை
34.	திருவண்ணாமலை	TV	திருவண்ணாமலை	30 செப்டம்பர் 1989	வட ஆற்காடு	6,191	24,64,875	398	திருவண்ணாமலை செங்கம் கீழ்பெண்ணாத்தூர் தண்டராம்பட்டு ஆரணி போளூர் கலசப்பாக்கம் சமுனாமரத்தூர் செய்யார் சேத்துப்பட்டு வந்தவாசி வெம்பாக்கம்
35.	திருவாரூர்	TR	திருவாரூர்	18 அக்டோபர் 1991	தஞ்சாவூர்	2,161	12,64,277	585	குடவாசல் கூத்தாநல்லூர் மன்னார்குடி நன்னிலம் நீடாமங்கலம் திருத்துறைப்பூண்டி திருவாரூர் வலங்கமைான்
36.	வேலூர்	VE	வேலூர்	30 செப்டம்பர் 1989	வட ஆற்காடு	2030.11	16,14,242	795	அணைக்கட்டு குடியாத்தம் பேரணாம்பட்டு காட்பாடி வேலூர் கீழ்வைத்தியனான்குப்பம்
37.	விழுப்புரம்	VL	விழுப்புரம்	30 செப்டம்பர் 1993	தென் ஆற்காடு மாவட்டம்	3725.54	20,93,003	562	செஞ்சி மரக்காணம் மேல்மலையனூர் திண்டிவனம் வானூர் விக்கிரவாண்டி விழுப்புரம் கண்டாச்சிபுரம் திருவெண்ணெய்நல்லூர்
38.	விருதுநகர்	VR	விருதுநகர்	15 மார்ச் 1985	மதுரை மற்றும் இராமநாதபுரம்	4,288	19,42,288	453	அருப்புக்கோட்டை காரியாபட்டி இராஜபாளையம் சாத்தூர் சிவகாசி திருவில்லிப்புத்தூர் திருச்சுழி விருதுநகர் வத்திராயிருப்பு வெம்பக்கோட்டை

முந்தைய மாவட்டங்கள்

மாவட்டம்	ஆண்டுகள்	பின்னர் வந்த மாவட்டங்கள்
செங்கல்பட்டு	1956–1997	காஞ்சிபுரம், செங்கல்பட்டு(2019 முதல்) மற்றும் திருவள்ளூர்
வட ஆற்காடு	1956–1989	திருவண்ணாமலை, வேலூர், இராணிப்பேட்டை(2019 முதல்) மற்றும் திருப்பத்தூர்(2019 முதல்)
தென் ஆற்காடு	1956–1993	கடலூர், விழுப்புரம் மற்றும் கள்ளக்குறிச்சி (2019 முதல்)

மாவட்டம் பிரிப்பு கோரிக்கைகள்

அதிகரிக்கும் மக்கள்தொகையைக் கணக்கில் கொண்டும் மற்றும் நிர்வாக வசதிகளுக்காகவும் புதிய மாவட்ட பிரிப்பு கோரிக்கைகள் அதிகரித்துள்ளன.

திருவண்ணாமலை மாவட்டத்தை இரண்டாகப் பிரித்து ஆரணி, போளூர், வந்தவாசி, சேத்துப்பட்டு, செய்யார், வெம்பாக்கம், சமுனாமரத்தூர் ஆகிய தாலுகாக்களை உள்ளடக்கி ஆரணி தலைமையில் புதிய மாவட்டம் உருவாக்கப்படும் என 2020 இல் அப்போதைய இந்து சமய அறநிலையத் துறை அமைச்சர் சேவூர் ராமச்சந்திரன் தெரிவித்தார்.^[13] ஆரணியை தலைமையிடமாக கொண்டு புதிய மாவட்டம் உருவாக்கப்படும் என அப்போதைய முதல்வர் எடப்பாடி க. பழனிசாமி வாக்குறுதி அளித்தார்.^[14]

திண்டுக்கல் மாவட்டத்தை பிரித்து பழனியைத் தலைமையிடமாகக் கொண்டு புதிய மாவட்டம் அமைக்க வேண்டும் என கோரிக்கை உள்ளது.^[15]

கோயம்புத்தூர் மற்றும் திருப்பூர் மாவட்டங்களைப் பிரித்து பொள்ளாச்சியைத் தலைமையிடமாகக் கொண்டு புதிய மாவட்டம் அமைக்க வேண்டும் என கோரிக்கை உள்ளது.^[16]

ஈரோடு மாவட்டத்தைப் பிரித்து கோபிச்செட்டிப்பாளையம் நகரைத் தலைமையகமாகக் கொண்டு புதிய மாவட்டம் அமைக்க வேண்டும் என கோரிக்கைகள் எழுந்துள்ளன.^[16]

தஞ்சாவூர் மாவட்டத்தில் உள்ள கும்பகோணத்தைத் தலைமையிடமாகக் கொண்டு பாபநாசம், திருவிடைமருதூர் மற்றும் கும்பகோணம் ஆகிய நகரங்களை உள்ளடக்கி புதிய மாவட்டம் உருவாக்கப்பட வேண்டும் என கோரிக்கை உள்ளது.^[17] தஞ்சாவூர் மாவட்டத்தைப் பிரித்து பட்டுக்கோட்டை தலைமையில் புதிய மாவட்டம் அமைக்க வேண்டும் என பட்டுக்கோட்டை முன்னாள் சட்டமன்ற உறுப்பினர் சி.வி. சேகர் கோரிக்கை வைத்துள்ளார்.^[18]

வடக்கு சென்னை மக்கள் நலச்சங்கங்களின் கூட்டமைப்பு, சென்னையை இரண்டாகப் பிரித்து, வடசென்னையை புதிய மாவட்டமாக அறிவிக்க வலியுறுத்தி வருகிறது.^[19]

திருவள்ளூர் மாவட்டத்தைப் பிரித்து, பொன்னேரியைத் தலைநகராகக் கொண்டு, புதிய மாவட்டம் அமைக்க வேண்டும் எனவும் அப்பகுதி மக்கள் வலியுறுத்தி வருகின்றனர்.^[20]

திருவாரூர் மாவட்டத்தைப் பிரித்து மன்னார்குடி, பட்டுக்கோட்டை, பேராவூரணி ஆகிய பகுதிகளை உள்ளடக்கி மன்னார்குடி மாவட்டம் வேண்டும் என பொதுமக்கள் வலியுறுத்தி வருகின்றனர்.^[21]

திருநெல்வேலி மற்றும் தென்காசி மாவட்டங்களைப் பிரித்து சங்கரன்கோவிலைத் தலைமையிடமாகக் கொண்டு உருவாக்க வேண்டும் என பொதுமக்கள் வலியுறுத்தி வருகின்றனர்.^[22]

தூத்துக்குடி மாவட்டத்தை பிரித்து கோவில்பட்டியை தலைமையிடமாகக் கொண்டு உருவாக்க வேண்டும் என பொதுமக்கள் வலியுறுத்தி வருகின்றனர்.^[23]

கடலூர் மாவட்டத்தை பிரித்து விருத்தாசலத்தை தலைமையிடமாக கொண்டு விருத்தாசலம், வேப்பூர், திட்டக்குடி, முஷ்ணம் ஆகிய வருவாய் வட்டங்களுடன், பண்ருட்டி மற்றும் குறிஞ்சிப்பாடி வட்டங்களில் உள்ள சில வருவாய் கிராமங்களை பிரித்து புதிதாக நெய்வேலி வட்டத்தையும் உருவாக்கி விருத்தாசலம் மாவட்டம் உருவாக்கப்பட வேண்டும் என பொதுமக்கள் வலியுறுத்தி வருகின்றனர்.^[24]